በአራት ዞኖች ውስጥ የሚገኙ በኢንጅነር ኃይሉ ሻውል የሚመራው  የቅንጅት ለአንድነትና ለዴሞክራሲ ፓርቲ አባላት በሥርዓተ-አገዛዙ ሰብዓዊ እርዳታዎች እንዳይሰጣቸው የተከለከሉ መሆኑን ሰሞኑን የየዞኑ የፓርቲው ኮሚቴ ሰብሳቢዎች በሰጡት መግለጫ ታወቀ፡፡

     አባላቱ በስሕተት እርዳታ አግኝተው ቢገኙ እንኳን ወይም በሥራ መርሐ-ግብር መሣተፋቸው ቢታወቅ ወዲያው ያገኙትን ጥቅማ ጥቅም ተቀምተው እንዲሁም በአገዛዙ አካላትና በካድሬዎች ተደብድበው እንደሚባረሩ ታውቋል፡፡

     በተመሣሣይ መልኩ በወላይታ፤ በጌዴኦና በጎፋ ልዩ ዞኖች በሚገኙ ሰላሣ ሶስት ወረዳዎች ውስጥ በኢንጅነር ኃይሉ ሻውል የሚመራው የቀድሞ የቅንጅት ለአንድነትና ለዴሞክራሲ ፓርቲ አባላት በተራበው ሕዝብ ስም ከውጭ ሀገር ከሚላከው የምግብ እርዳታ ምንም የማይሰጣቸው ሲሆን የፓርቲው አባል ቤተሰብ አባላት የሆኑ ታማሚ ሕፃናት እንኳን በሕፃናት ስም የመጡ አልሚ ምግቦችን እንዳያገኙ በአገዛዝ አካላት የተከለከሉ መሆናቸውን ታማኝ ምንጮች አረጋግጠዋል፡፡

     በሁሉም ዞኖች የአገዛዝ አካላት "ቅንጅት ይመግባችሁ! የእናንተ መንግሥት ቅንጅት አይደል?" እያሉ በፓርቲው አባላት ቤተሰቦች ላይ የሚያላግጡ ሲሆን ረኃብተኞቹ በሕዝብ ስም ከመጣው እርዳታ የማግኘት መብት እንዳላቸው ጠቅሰው ለበላይ አካላት ቢያመለክቱም አዎንታዊ መልስ እንዳልተጣቸው ታውቋል፡፡